Moosadidi's Blog

މާތްﷲ ގެ އަމާނާތް ތަކަށް ޚިޔާނާތް ތެރިނުވާށޭވެ.

moosadidi — Thu, 02 Jul 2009 21:08:11 +0000

ހަމަކަށަވަރުން އިންސާނުންނަކީ އެއްމެ މާތްމަޚްލޫޤުން ކަމުގައި މާތްﷲ ސުބުޙާނަހޫ ވަތަޢާލާ ވަނީދުނިޔޭގައި ލަހައްޓަވާފައެވެ.އަދިބުއްދީގެ އަހުލުވެރީން ކަމުގައިލެއވިއެވެ. މިފަދަ ގިނަގުނަ އެތައް ސިފައެއް ދެއްވުމަށްފަހު އެކަލާންގެ ވަނީ މަސްއޫލީޔަތު ތަކަކާ އަމާނާތް ތަކެއް އަޅުގަނޑުމެންނާއި ޙަވާލު ކުރައްވާފައެވެ. އޭގެ ތެރޭގައި ދުނިޔަވީ އަމާނާތް ތަކަކާއި އުޚްރަވީ ޒިންމާތަކެއް އަޅުގަނޑު މެންނާ އެކަލާނގެ ޙަވާލު ކުރެއްވާފައެވެ.
އެހެން ކަމުން ކުޑަކުދީން ނަކީ އަޅުގަނޑު މެންނާއި އެކަލާންގެ ޙަވާލު ކުރައްވާފައިވާ ވަރަށްބޮޑު އަމާނާތެކެވެ. މައިމީހާގެ ރަޙިމުގެތެރޭގައި ކުޑަކުއްޖާ އަށަގަންނަ ދުވަހުން ފެށިގެން ދެމަފިރިންގެ ޒިންމާތަކެއްވާކަން ކަށަވަރެވެ.
ކުޑަކުއްޖާ ސިއްޙަތު ސަލާމަތުން ދުނިޔެއަށް އުފަން ވުމާއިއެކު އެކަލާންގެ ‘އެ އަމާނާތް ދެމަފިރިންނާއި ޙާވާލުވީއެވެ. މިއަމާނާތައް ޚީޔާނާތްތެރި ވުމުގެ ޙައްޤު ދެމަފިރިން ކުރެން އެކަކަށް ވެސް ލިބިގެނެއް ނުވެއެވެ. އެހެނީ ކުޑަކުއްޖާއަކީ ފިޠުރަތުގެ ސާފުފުކަންމަތީ ދުނިޔެއަށް އުފަންވާ، އެއްވެސް ކުށެއްނެތް އިންސާނަކަށް ވާތީއެވެ.
ނަމަވެސް އަޅުގަނޑު މެންގެ މިއިސްލާމީ، މި ކުޑަކުޑަ މުޖުތަމައުގާވެސް ކުޑަކުދީންނަށްކުރާ އަނިޔާވަނީ އިންތިހާއަށް މައްޗަށް ގޮސްފައެވެ. ކުޑަކުދީން އުފަންވުމާއި އެކު މަރާލުމަކީ މިއަދު މިމުޖުތަމަޢުގައި ޢާންމުވެ ހިނގަމުންދާ ޙަޤީޤަތެކެވެ. މިދަރަޖައަށް މިއަދު އަޅުގަނޑުމެން ވެއްޓެން ޖެހޭސަބަބަކީކޮބައިތޯއެވެ؟ މިއަދު އަޅުގަނޑުމެން މިކަމާއި ދެކޮޅަށް ކިތަންމެ އަޑުއުފުލިޔަސް، މިޢަމަލުތައް ހުއްޓޭނެތޯއެވެ؟
އަޅުގަނޑުގެ ނަޒަރުގައި މިފަދަޢަމަލު ކުރާމީހުން މިމުޖުތަމައުގައި މެރުމަކީ ޙައްލެއްކަމުގައި ނުދެކެމެވެ. ނަމަވެސް މިބަހުގެ މުރާދަކީ ފަހަރެއްގައިވެސް ދީން ޒަމާނަށް ނުފެތޭ ވާހަހައެއް ނޫނެވެ. އަދިމިފަދަ ކަންތަކަށް ހިއްވަރު ލިބޭ ފަދަ ޖުމްލައެއް ބުނުމެއްވެސް ނުމެނޫންމެއެވެ. ނަމަވެސް މިފަދަ ޙުކުމްތަކަކީ، ފުރިހަމަ އިސްލަމީމުޖުތަމަޢަކަށް އެއްމެ އެކަށީގެންވާ ޙުކުމް،ކަންކަށަވަރެވެ.
އާއެކެވެ! މިކަމުގެ ޙައްލަކީ މިމުޖުތަމައުގައި އިސްލާމީ ޢަޤީދާ ހަރުދަނާކުރުމުގެ ފުރިހަމަ ޕްރޮގްރާމު ތަކެއް ހިންގުމެވެ. ނަފްސާނީ ގެއްލުން ވެދާނޭ ކަމަށްބުނެ ދީނީމުހިންމު ޢަަސާސްތައް އަޅުގަނޑުމެންގެ ކުދަކުދީންނަށް ބުނެނުދީ ނުބޭއްވުމެވެ. އަޅުގަނޑުމެންނަކީ ވަކިފަރާތަކުން ހައްދަވާފައިވާ މަޚްލޫޤުން ކަން ހަނދާން ކޮށދިނުމެވެ.އެކަލާންގެ އަޅުގަނޑުމެން ގެންދަވާނޭ ކަމާއި އޭގެފަހުން އުޚްރަވީ ޙަޔާތް ފެށިގެން ދާނޭކަން އެކުދީންގެ ޅަޢުމުރުގައި ވިސްނާދިނުމެވެ.
ކުޑަކުދީންނަށް ކުރާގޯނާތަކާއި ބެހޭގޮތުން މިއަދު ޖަމާޢަތުގެފެންވަރު ގައްޔާއި ޤައުމީ ފެންވަރުގައި އަޑު އުފުލަނީއެވެ. އެއަޑު އުފުލާމީހުން ވަނީ އަޑު އުފުލަމުން ގޮސް، ވަރުބަލިވެފައެވެ. ނަފްސަނީކައުން ސިލަރުން ވަނީ މިކަމުގައި ވަރުބލިވެ ބަނޑުޖަހަފައެވެ. މުޅިމުޖުތަމައު ވަނީ ފަސާދައިގެ ބޮޑުކަނޑަކަށް ޢަރަޤުވުމަށް މިސްރާބުޖަހާފައެވެ. ނަމަވެސް އިސްލަމް ދިނުގެ ފުރިހަމަ ނަޒަރީއްޔަތަކުން މިކަމާ ދޭތެރޭ ވިސްނާ ފިކުރު ކުރަނީ މަދުބައެކެވެ.
ޅައުމުރުގައި، ފުރިހަމަ އިސްލާމީ ތަރުބިއްޔަތުން، ބޮޑުކުރާ ކުދީން އެފަދަ ބޮޑެތިޖަރީމާ ތަކަށް އަރައިނުގަންނާނޭކަން ކަށަވަރެވެ. ހަމަކަށަވަރުން މައިން ބަަފައިންގެ ހިތްތަކަށް ފިނިކަން ގެނެސް ދެނޭ ކުދީން ތަކެއް ކަން ކަށަވަރެވެ.

ﷲ ގެ ޢަދާވާތް ތެރިޔާ އާއި ހިލަ.

moosadidi — Thu, 25 Jun 2009 14:11:14 +0000

ޝައްކެއް ނެތެވެ. މުޙައްމަދު ޞައްލަﷲ ޢަލައިހި ވަސައްލަމަގެ މުޢުޖިޒާތް ތަކުގެތެރެއިން ހިމެނިގެންނަވާ އެއްކަމަކީ އެކަލޭގެފާނަށް ﷲތަޢާލާގެ ޙިމާޔަތްތެރިކަން ދެއްވުމެވެ. އަދިއެއްވެސް މީހެއްގެ ކިބައިން ނުބައިކަމެ ނުވަތަ އުނދަގުލެއް އެކަލޭގެފާނަށް ފޯރުމުން ﷲތަޢާލާ އެކަލޭގެފާނު ރައްކާތެރި ކުރެއްވުމެވެ. އެހެނީ، އެކަލޭގެފާނަށް ގެއްލުމެއް ދިނުމަށް މަސައްކަތް ކުރާމީހާ އަކީ އެފަދަކަމެއް ކުރުމަށް ކިތަނމެ ޤާބިލުކަމާއި ކުޅަދަނަކަން ލިބިގެނެންވާ މީހެއްކަމުގައި ވީނަމަވެހެވެ.

އެއްދުވަހަކު އަބޫޖަހުލު އޭނާގެ ޤައުމުގެ މީހުންނަށް ބުންޏެވެ. އޭ ! ޤުރައިޝު ވަންހައިގެ މީހުންނެވެ! ހަމަކަށަވަރުން މުޙައްމަދުގެފާނު އަހުރެމެންގެ އިލާހުންތަކަށް ނިކަމެތިބަސްތައް ވިދާޅުވެއެވެ. އަދި އަހުރެމެންގެ ދީނަށް ހުތުރުބަސްތައް ވިދާޅުވެ ބުދަށް އަޅުކަން ކުރުން ދޫކޮށްލުމަށް ގޮވާލައްވައި، އަހުރެމެން އެކަލޭގެފާނުގެ އެއްކައުވަންތަ އިލަހަށް އަޅުކަން ކުރުމަށް ގޮވާލައްވައެވެ.

މާތްރަސްކަލާނގެ ގަންދީބުނަމެވެ. ހަމަކަށްވަރުން އަހުރެން މަދަމަ ބޮޑު ހިލައެއް ހިފައިގެންގޮސް އެކަލޭގެފަނަށް އިންތިޒާރު ކުރާހުށީމެވެ. އެކަލޭގެފާނު ނަމަދުކުރައްވަން ވަޑައިގެން، ސަޖިދަ ކުރައްވައިފިނަމަ އަހުރެން އެހިލައިން އެކަލޭގެފަނުގެ އިސްތަށިފުޅުގައި ޖަހާހުށީމެވެ. ދެން ވާނެކަމެއް ވެދާނެއެވެ. އެކަލޭގެފާނުގެ މިކަން ތަކުން އަހުރެން ތިޔަބައިމީހުންނަށް ހިތަހަމަޖެހުން ލިބިދޭހުށީމެވެ.

އަނެއްދުވަހު ހެނދުނުއަބޫޖަހުލު ހިލަހިފައިގެންގޮސް ރަސޫލުﷲގެފާނު ނަމަދަށް ވަޑައިގަންނަވާ ވަގުތު އިންތިޒާރުކުރުމުގައި އިށީދެއިނެވެ. އެއިރު ޤުރައިށު ވަންހައިގެ މީސްތަކުންވެސް އެމީހުންގެ ނާދީތަކުގައި އަބޫޖަހުލު ކުރާކަމެއް ބެލުމުގެ އިންތިޒާރުގައި ތިއްބެވެ.

މިހެންތިއްބައި ރަސޫލުﷲ ޞައްލަﷲ ޢަލައިހިވަސައްލަމަ ނަމާދަށް ވަޑއައިގެންފިއެވެ. އަބޫޖަހުލު ޤަޞްދު ކޮށްގެން އުޅޭކަމެއް އެކަލޭގެފާނަށް އެނގިވަޑައެއް ނުގަންނަވައެވެ. އެކަލޭގެފާނު ނަމާދުފުޅުގައި ސަޖިދައަށް ވަޑައިގެންނެވިހިނދު އަބޫޖަހުލުގެނައި ބޮޑުހިލަ ބަރުކަމުން ވަރަށް އުނދަގުލުން އުފުލައިގެން މުޙައްމަދުގެފާނާއި ދިމާއަށް ހިނގައިގަތެވެ.

ރަސޫލުﷲގެފާނު ސަޖިދައަށް އޮންނަވަނިކޮށް އެކަލޭގެފާނާއި ދާދިއަރިހަށް އެހިލަ ހިފައިގެން ދިއުމަށްފަހު ކުއްލިއަކަށް އޭނާ ފަހަތްފަހަތަށް އަންނާން ފަށައިފިއެވެ. އެއިރުއޭނާގެ މޫނުމަތީކުލަ ރަތްކުލައަށް ބަދަލުވެ’ މޫނުމަތީން ބިރުވެރިކަމާއި ސިހުންވެރިކަން ފާޅުވެއެވެ.އަދިއޭނާގެ އަތުގައިއޮތް ބޮޑުހިލަ ފިސާރި ދުރަށް އެއްލާލިއެވެ.

މިމަންޒަރު ބަލަންގޮސްތިބި ޤުރައިޝުވަންހައިގެ މީހުން އަބޫޖަހުލުގެ ޙާލުފެނިފައި ވަރަށްބޮޑަށް ޙައިރާންވިއެވެ. އަދިއެމީހުން ބުނަމުންދިޔައެވެ. އޭނާ މުޙައްމަދުގެފާނާއި އެހާކައިރިއަށް ދިއުމަށްފަހުވެސް އެކަލޭގެފާނުގެ ގައިކޮޅުގައި ނުޖަހާ އެނބުރި ފަހަތަށް އައީކީއްވެ ހެއްޔެވެ؟

ޤުރައިށު ވަންހައިގެ މީހުންގެ ތެރެއިން މީހަކު ތެދުވެގެންގޮސް އަބޫޖަހުލާ ސުވާލުކުރިއެވެ. އޭ ! އަބޫޖަހުލެވެ. ކަލެއަށް ޖެހުނީކޮންކަމެއް ހެއްޔެވެ؟ މުޙައްމަދުގެފާނުގެ އިސްތަސިފުޅުގައި ހިލައިން ނުޖަހާ ކަލޭ އެނބުރިއައީ ކީއްވެގެން ހެއްޔެވެ؟

އަބޫޖަހުލު ބުންޏެވެ. އެހިލަ ހިފައިގެންގޮސް އަހުރެން މުޙައްމަދުގެފާނާއި ކައިރިވިހިނދު އަހުރެންނަށް ފެންނަނީ ބޮޑުވެގެންވާ ޖަމަލެކެވެ. އެފަދަބޮޑު ޖަމަލެއްއަހުރެންގެ މުޅިޙަޔާތުގައިވެސްް އަހުރެންނަކަށް ނުފެނެއެވެ. އެޖަމަލުއޮތީ އަހުރެންނާ އެކަލޭގެފާނާއި ދެމެދުގައި ހުއްޓިގެންނެވެ. އަދި އެޖަމަލު އަހުރެން ކާލަން އުޅުނެވެ. އެހިނދު އަހުރެންނަށް ލިބުނު ކުއްލި ސިހުމެއްގެ ސަބަބުން ކުރަންދިޔަ ކަންތައް ހަނދާން ނެތިފަހަށް ޖެހެވުނީއެވެ.

ތަރުޖަމާ : (މުޢުޖިޒާތުންނަބީޔި ޟައްލަﷲ ޢަލައިހިވަސައްލަމަ ލިލްއަޡްފާލް)